ye alag baat ki vo mujh se ḳhafa rahta hai
main ik insan huun aur mujh men ḳhuda rahta hai
meri baton men bahut us ki jhalak aati hai
us ke lahje men mira zehn basa rahta hai
qaid men us se bahadur na koi dekha tha
ab jo azad hai thoḌa sa Dara rahta hai
aur logon ki nigahon men bura ho lekin
apni nazron men bhi gir jaa.e to kya rahta hai
pul se guzre to nadi dhyan se dekhi ham ne
varna manzar ye nigahon se chhupa rahta hai
Leave a Reply