Be-Samt-O-Be-KHayal Thi Aur Main Safar Mein Thi

Dua Ali

be-samt-o-be-ḳhayal thi aur main safar men thi

vo shaam pur-malal thi aur main safar men thi

aise hi ik safar men tha vo mere saath saath

so qurb se nihal thi aur main safar men thi

ik rasta tavil tha rim-jhim ka tha saman

vo shaam be-misal thi aur main safar men thi

aisi hi ek shaam thi jab vo chala gaya

bas gham se main niDhal thi aur main safar men thi

bas itna yaad tha mujhe chalna hai be-thakan

himmat miri bahal thi aur main safar men thi

kab shaam Dhal ga.i ‘dua’ aur raat aa ga.i

ab tirgi saval thi aur main safar men thi