Rakhshan Hashmi
siine men liye jiine ke arman hazaron
mar jaate hain har din yahan insan hazaron
sab husn ko ma.asum samajhte hain jahan men
aur ishq ke mathe pe hain bohtan hazaron
har zaḳhm ne baḳhshi hai jila mere junun ko
qatil tiri shamshir ke ehsan hazaron
la-hasili aḳhir ko hai har chiiz ka hasil
har naf.a ke pahlu men hain nuqsan hazaron
ik zabt ki divar sambhale rahi mujh ko
har chand uThe mujh men bhi tufan hazaron
kuchh baat to us shoḳh men aisi hai yaqinan
phirte hain hatheli pe liye jaan hazaron
ai kaash mire sher pe kahta koi ‘raḳhshan’
qurban tire sher par divan hazaron
Leave a Reply