aaj lagta hai samundar men hai tughyani si
jaane kis dahr se aaya hai ye tufan-e-bala
ye jo tufan ki is men hain khandar khvabon ke
tutte khvab hain dhundli si guzargahon ke
an-kahi koi kahani koi jalta aansu
aa ke daman pe thaharta hua be-kal shikva
chup si sadhi hai mire but ne
magar ankhon men
mere har taj-mahal ki hai haqiqat vazeh
jis men rahti hai vo shahzadi jise qudarat ne
dil dhadakta hua bakhsha hai badan patthar ka
main ne dekha hai ki vo raat ke andhiyaron men
apne tuute hue par khud hi jila deti hai
apne ashkon ke diye khud hi bujha deti hai
khud hi apne liye likhti hai sazaon ki kitab
apne hathon se chhupa deti hai zakhmon ke gulab
aaj lagta hai samundar men hai tughyani si
aaj larzish si hai pairon men thakan sanson men
kirchiyan chubhne lagi hain jo miri ankhon men
aaj lazim hai ki chup-chap guzar jaae shaam
koi aahat ho na dastak na hi chhilke koi jaam
aaj aine se katra ke guzar jaana hai
aaj shab ghor-andhere men utar jaana hai
phir naya din nai muskan jaga laega
shab ka tufan kinaron se utar jaega
aaj lagta hai samundar men hai tughyani si
Leave a Reply