Poet
jaane kis vaste dil chashm-e-karam mange hai
zindagi aap se phir dida-e-nam mange hai
ham kahan ja.enge ab teri gali se uTh kar
kis ka dil hai jo yahan dair-o-haram mange hai
mujh ko phulon ki havas hai na to moti ki talash
kasa-e-chashm mira dast-e-karam mange hai
chashm-e-nam ko kisi daman ki tamanna hi sahi
dil-e-betab magar aap ka gham mange hai
jaane kis vaste ik shaḳhs ki bahki hui chaal
har-qadam aap ke hi naqsh-e-qadam mange hai
koi divana tamannaon ko zaḳhmi pa kar
zindagi-bhar ke liye ranj-o-alam mange hai
a.ina-ḳhanon ki yak-rangi se ukta ke ‘ra.is’
azar-e-vaqt bhi patthar ke sanam mange hai
Leave a Reply