Nasreen Naqqash
kya haqiqat hai kya kahani hai
muḳhtasar apni zindagani hai
TuuT kar bah rahi hain chaTTanen
aaj gham men baḌi ravani hai
kaash pardes se chale aao
aaj ki shab baḌi suhani hai
aaj tak intizar hai us ka
ek laḌki baḌi divani hai
aaj pahchanta nahin mujh ko
main ne har baat jis ki maani hai
tujh ko apna bana ke chhoḌungi
ab yahi baat dil men Thani hai
us ko paane ki aas men ‘nasrin’
ham ne sahra ki ḳhaak chhani hai
Leave a Reply