nazar ke bhed sab ahl-e-nazar samajhte hain
jo be-ḳhabar hain unhen be-ḳhabar samajhte hain
na un ki chhanv men barkat na barg-o-bar men faiz
vo ḳhud-numud jo ḳhud ko shajar samajhte hain
unhon ne jhukte hue peḌ hi nahin dekhe
jo apne kaghzi phal ko samar samajhte hain
hisar-e-jan dar-o-divar se alag hai miyan
ham apne ishq ko hi apna ghar samajhte hain
kushada-dil ke liye dil bahut kushada hai
ye main to kya mire divar-o-dar samajhte hain
miri harif nahin hai ye nil-gun vus.at
aur is faza ko mire bal-o-par samajhte hain
akela chhoḌne valon ko ye bata.e koi
ki ham to raah ko bhi ham-safar samajhte hain
tujhe to ilm ke do chaar harf le baiThe
samajhne vaale yahan umr bhar samajhte hain
samajh liya tha tujhe dost ham ne dhoke men
so aaj se tujhe bar-e-digar samajhte hain
jo ashna.i ke ḳhanjar se ashna hain ‘sa.ud’
vo dast-e-dost ke saare hunar samajhte hain
Leave a Reply