musalsal aankh men yuun aana jaana ansuon ka hai
mira chehra hai aur mehman-khana ansuon ka hai
bahut mushkil bayan hai chashm-o-dil ke khuun hone ka
bahut asan palkon se girana ansuon ka hai
pade rahte hain us ki diid ke kuchh aks konon men
vagarna aankh men saara thikana ansuon ka hai
faqat tajdid-e-nau ki baat hai har ahd men varna
tumhare hijr se rishta purana ansuon ka hai
bahut asan sahi daman pe girna chand qatron ka
bahut mushkil sar-e-mizhgan uthana ansuon ka hai
khayal-o-khvab ko ‘afroz’ koi aa ke samjha de
bulana us ki yadon ka bulana ansuon ka hai