Pandit Vidya Rattan Asi
zindagani jab hamen raas aa.egi
dekh lena maut bhi aa ja.egi
vo nazar jab bhi karam farma.egi
laziman duniya hamen apna.egi
mere ghar se sham-e-gham kab ja.egi
aaj ja.egi to kal phir aa.egi
kaun zinda rah sakega bin tire
kis se ye tohmat uTha.i ja.egi
kaun jaane kya ho phir tauba ka hashr
mai-kade par jab ghaTa ghar aa.egi
ek din ham ḳhaak men mil ja.enge
har haqiqat dastan ban ja.egi
kya karun un ki nasihat ka gila
doston se aur kya ban aa.egi
main na kahta tha na puchhen mera haal
aap ko sun kar hansi aa ja.egi
gardish-e-dauran ko samjha dijiye
ham se uljhegi to munh ki kha.egi
vo miTane ko hain ai ‘asi’ hamen
ye ḳhalish bhi ek din miT ja.egi
Leave a Reply