ab ahl-e-dard ye jiine ka ehtimam karen
use bhula ke gham-e-zindagi ka naam karen
fareb kha ke un ankhon ka kab talak ai dil
sharab-e-kham piyen raqs-e-na-tamam karen
gham-e-hayat ne avara kar diya varna
thi aarzu ki tire dar pe subh o shaam karen
na mangun bada-e-gul-gun se bhiik masti ki
agar tire lab-e-lalin mira ye kaam karen
na dekhen dair o haram su-e-rah-ravan-e-hayat
ye qafile to na jaane kahan qayam karen
hain is kashakash-e-paiham men zindagi ke maze
phir ek baar koi sai-e-na-tamam karen
sikhaen dast-e-talab ko ada-e-bebaki
payam-e-zer-labi ko sala-e-am karen
ghulam rah chuke toden ye band-e-rusvai
kuchh apne bazu-e-mehnat ka ehtiram karen
zamin ko mil ke sanvaren misal-e-ru-e-nigar
rukh-e-nigar se raushan charagh-e-bam karen
phir uth ke garm karen karobar-e-zulf-o-junun
phir apne saath use bhi asir-e-dam karen
miri nigah men hai arz-e-moscow ‘majruh’
vo sarzamin ki sitare jise salam karen