Basir Sultan Kazmi
hote hain jo sab ke vo kisi ke nahin hote
auron ke to kya honge vo apne nahin hote
mil un se kabhi jagte hain jin ke muqaddar
teri tarah har vaqt vo so.e nahin hote
din men jo phira karte hain hushiyar o ḳhabar-dar
vo meri tarah raat ko jaage nahin hote
ham un ki taraf se kabhi hote nahin ghafil
rishte vahi pakke hain jo pakke nahin hote
aghyar ne muddat se jo roke hue the kaam
ab ham bhi ye dekhenge vo kaise nahin hote
nakami ki surat men mile tana-e-na-yafat
ab kaam mire itne bhi kachche nahin hote
shab ahl-e-havas aise pareshan the ‘basir’
jaise mah-o-anjum kabhi dekhe nahin hote
Leave a Reply