Ajay Sahaab
laga ke dhaḌkan men aag meri ba-rang-e-raqs-e-sharar gaya vo
mujhe bana ke sulagta sahra mire jahan se guzar gaya vo
yuun niind se kyuun mujhe jaga kar charagh-e-ummid phir jala kar
hui sahar to use bujha kar hava ke jaisa guzar gaya vo
vo ret par ik nishan jaisa tha mom ke ik makan jaisa
baḌa sambhal kar chhua tha main ne pa ek pal men bikhar gaya vo
vo saath mere tha jaise har pal vo dekhta tha mujhe musalsal
zara sa mausam badal gaya to chura ke mujh se nazar gaya vo
vo ek bichhḌe se miit jaisa vo ik bhulae se giit jaisa
koi purani si dhun jaga kar vajud-o-dil men utar gaya vo
vo dost saare the chaar pal ke jo chal diye ham-safar badal ke
‘sahab’-e-nadan vahin khaḌa hai usi dagar par Thahar gaya vo
Leave a Reply