Pandit Daya Shankar Naseem Lakhnavi
jab na jite-ji mire kaam aa.egi
kya ye duniya aqibat baḳhsha.egi
jab mile do dil muḳhil phir kaun hai
baiTh jaao ḳhud haya uTh ja.egi
gar yahi hai is gulistan ki hava
shaḳh-e-gul ik roz jhonka kha.egi
dagh-e-sauda ek din dega bahar
fasl is gul ki shagufa la.egi
kuchh to hoga hijr men anjam-e-kar
be-qarari kuchh na kuchh Thahra.egi
sandali rangon se maana dil mila
dard sar ki kis ke mathe ja.egi
ḳhaksaron se jo rakkhega ghubar
o falak badli tiri ho ja.egi
jab karega garmiyan vo shola-ru
sham-e-mahfil dekh kar jal ja.egi
jaan nikal ja.egi tan se ai ‘nasim’
gul ko bu-e-gul hava batla.egi
Leave a Reply