Qarib Bhi to Nahin Ho Ki Aa Ke so Jao

qarīb bhī to nahīñ ho ki aa ke so jaao

sitāroñ jaao kahīñ aur jā ke so jaao

thakan zarūrī nahīñ raat bhī zarūrī nahīñ

koī hasīn bahāna banā ke so jaao

kahāniyāñ thī vo rāteñ kahāniyāñ the vo log

charāġh gul karo aur bujh-bujhā ke so jaao

tarīq-e-kār badalne se kuchh nayā hogā

jo duur hai use nazdīk lā ke so jaao

ḳhasāre jitne hue haiñ vo jāgne se hue

so har taraf se sadā hai ke jā ke so jaao

ye kār-e-sher bhī ik kār-e-ḳhair jaisā hai

ke taaq taaq jalo lau baḌhā ke so jaao

udaas rahne kī aadat bahut burī hai tumheñ

latīfe yaad karo hañs-hañsā ke so jaao

Leave a Comment