baithe baithe jo ham ai yaar hanse aur roe
aa gaya yaad to ik baar hanse aur roe
sher-e-tar padhne se yaron men hamen kya hasil
magar itna hai ki do-char hanse aur roe
shadi o gham ki jo uth jaae jahan se rah-o-rasm
phir to koi bhi na zanhar hanse aur roe
na-tavani ne kiya us ko to naqsh-e-qalin
kya tiri chashm ka bimar hanse aur roe
‘mushafi’ raat men afsana-e-dil kahta tha
sun ke ham-sae kai baar hanse aur roe
Leave a Reply