abroo-shah-mubarak

Dil Nin Pakdi Hai Yar Ki Surat

dil niin pakdi hai yaar ki surat

gul hua hai bahar ki surat

koi gul-ru nahin tumhari shakl

ham ne dekhin hazar ki surat

tujh gali biich ho gaya hai dil

dida-e-intizar ki surat

husn ka malak ham niin sair kiya

kahin dekhi na pyaar ki surat

ab zamana sabhi tarah bigda

kya bane rozgar ki surat

vasl ke biich hijr ja hai bhuul

juun nashe men khumar ki surat

is zamane ki dosti ke taiin

kuchh nahin e’tibar ki surat

kuchh thaharti nahin ki kya hogi

is dil-e-be-qarar ki surat

mubtazil aur kharab ho kar ke

apni launDe niin khvar ki surat

‘abru’ dekh yaar ka bro-dosh

dil hua hai kanar ki surat

More Poems

Leave a Comment