chashmak-zani men karti nahin yaar ka lihaz
nargis ki aankh men bhi nahin hai zara lihaz
be-gali ab to baat bhi karte nahin kabhi
vo ibtida men karte the be-intiha lihaz
tanha main aur itne vahan hain mire raqib
naz-o-ada ghamza-o-sharm-o-haya lihaz
saaqi ki be-ruḳhi ki kahan taab thi magar
pir-e-mughan ki ruuh ka karna paḌa lihaz
kya vasf-e-chashm-e-yar karun is ke samne
nargis se hai faqat mujhe ik aankh ka lihaz
hurmat baḌi hai us ki na kar hajv is qadar
lazim hai duḳht-e-raz ka tujhe va.iza lihaz
nikli na ḳhum se bazm-e-javanan-e-mast men
pir-e-mughan ka bint-e-inab ne kiya lihaz
phir mujh se is tarah ki na kijega dil-lagi
ḳhair us ghaḌi to aap ka main kar gaya lihaz
be-ḳhud sharab-e-shauq ne shab ko ye kar diya
un ko raha hijab na mujh ko raha lihaz
qurban is hijab ke is sharm ke nisar
itna na ashiqon se kar ai mah-laqa lihaz
mahjub hai mizaj ‘qalaq’ apna is qadar
karte hain apne ḳhurd ka bhi ham bura lihaz
Leave a Reply