Chashmak-Zani Mein Karti Nahin Yar Ka Lihaz

chashmak-zanī meñ kartī nahīñ yaar kā lihāz

nargis kī aañkh meñ bhī nahīñ hai zarā lihāz

be-gālī ab to baat bhī karte nahīñ kabhī

vo ibtidā meñ karte the be-intihā lihāz

tanhā maiñ aur itne vahāñ haiñ mire raqīb

nāz-o-adā ġhamza-o-sharm-o-hayā lihāz

saaqī kī be-ruḳhī kī kahāñ taab thī magar

pīr-e-muġhāñ kī ruuh kā karnā paḌā lihāz

kyā vasf-e-chashm-e-yār karūñ is ke sāmne

nargis se hai faqat mujhe ik aañkh kā lihāz

hurmat baḌī hai us kī na kar hajv is qadar

lāzim hai duḳht-e-raz kā tujhe vā.izā lihāz

niklī na ḳhum se bazm-e-javānān-e-mast meñ

pīr-e-muġhāñ kā bint-e-inab ne kiyā lihāz

phir mujh se is tarah kī na kījegā dil-lagī

ḳhair us ghaḌī to aap kā maiñ kar gayā lihāz

be-ḳhud sharāb-e-shauq ne shab ko ye kar diyā

un ko rahā hijāb na mujh ko rahā lihāz

qurbān is hijāb ke is sharm ke nisār

itnā na āshiqoñ se kar ai mah-laqā lihāz

mahjūb hai mizāj ‘qalaq’ apnā is qadar

karte haiñ apne ḳhurd kā bhī ham burā lihāz

Leave a Comment