Wasi Shah
tire gale men jo banhon ko Daal rakhte hain
tujhe manane ka kaisa kamal rakhte hain
tujhe ḳhabar hai tujhe sochne ki ḳhatir ham
bahut se kaam muqaddar pe Taal rakhte hain
koi bhi faisla ham soch kar nahin karte
tumhare naam ka sikka uchhal rakhte hain
tumhare ba.ad ye aadat si ho ga.i apni
bikharte sukhte patte sambhal rakhte hain
ḳhushi si milti hai ḳhud ko aziyyaten de kar
so jan-bujh ke dil ko niDhal rakhte hain
kabhi kabhi vo mujhe hans ke dekh lete hain
kabhi kabhi mira behad ḳhayal rakhte hain
tumhare hijr men ye haal ho gaya apna
kisi ka ḳhat ho use bhi sambhal rakhte hain
ḳhushi mile to tire ba.ad ḳhush nahin hote
ham apni aankh men har-dam malal rakhte hain
zamane-bhar se bacha kar vo apne anchal men
mire vajud ke TukḌe sambhal rakhte hain
kuchh is liye bhi to behal ho ga.e ham log
tumhari yaad ka behad ḳhayal rakhte hain
Leave a Reply