niind aati hi nahin dhadke ki bas avaz se
tang aaya huun main is pur-soz dil ke saaz se
dil pisa jaata hai un ki chaal ke andaz se
haath men daman liye aate hain vo kis naaz se
saikadon murde jalae ho masiha naaz se
maut sharminda hui kya kya tire eajaz se
baghban kunj-e-qafas men muddaton se huun asiir
ab khule par bhi to main vaqif nahin parvaz se
qabr men rahat se soe the na tha mahshar ka khauf
baaz aae ai masiha ham tire eajaz se
vaae ghaflat bhi nahin hoti ki dam bhar chain ho
chaunk padta huun shikast-e-hosh ki avaz se
naaz maashuqana se khali nahin hai koi baat
mere lashe ko uthae hain vo kis andaz se
qabr men soe hain mahshar ka nahin khatka ‘rasa’
chaunkne vaale hain kab ham suur ki avaz se
Leave a Reply