Pawan Kumar
suni har baat apne rahnuma ki
yahi ik bhuul ham ne bar-ha ki
hui jo zindagi se ittifaqan
vahi bhuul us ne phir ik martaba ki
mujhi men gunjti hain sab sada.en
magar phir bhi hai ḳhamoshi bala ki
har ik kirdar men Dhalne ki chahat
matanat dekhiye bahrupiya ki
azal ke peshtar bhi kuchh to hoga
kahan phir had milegi ibtida ki
talatum hain mire meri hain lahren
mujhe kyuun justuju ho naḳhuda ki
hamare saath ho kar bhi nahin hai
shikayat kya karen us gum-shuda ki
har ik aahaT tiri aamad ka dhoka
kabhi to laaj rakh le is ḳhata ki
sarapa haa.e us nazuk badan ka
koi tasvir jaise apsara ki
Leave a Reply