Humne Sahra Ko Sajaya Tha Gulistan Ki Tarah

Faiz Ul Hasan Khayal

ham ne sahra ko sajaya tha gulistan ki tarah

tum ne gulshan ko banaya hai bayaban ki tarah

raat ka zahar piye ḳhvab ka anchal oḌhe

kaun hai saath mire gardish-e-dauran ki tarah

DhunDhta phirta huun ab tak bhi hain sahra sahra

usi lamhe ko jo tha fasl-e-baharan ki tarah

maslahat-kosh zamane ka bharosa kya hai

jo bhi milta hai yahan gardish-e-dauran ki tarah

aaj vo lamhe mujhe Daste hain tanha pa kar

kabhi mahbub the jo mujh ko dil-o-jan ki tarah

jaane kya baat hai kyuun jashn-e-masarrat men nadim

yaad aati hai tiri sham-e-ghariban ki tarah

kab talak shahr ki galiyon men phiroge yaaro

asmanon pe uḌo taḳht-e-sulaiman ki tarah

ye to parvanon ke dil hain jo pighal jaate hain

kaun jalta hai yahan sham-e-shabistan ki tarah

kaun ḳhvabon ke jazire se chala aaya ‘ḳhayal’

dil men ik raushni hai sub.h-e-daraḳhshan ki tarah