ye jo dhuan dhuan sa hai dasht-e-guman ke as-pas
kya koi aag bujh gai sarhad-e-jan ke as-pas
shor-e-hava-e-sham-e-gham yuun to kahan kahan nahin
suniye to bas sunai de dard-e-nihan ke as-pas
bujh gae kya charagh sab ai dil-e-afiyat-talab
kab se bhatak rahe hain ham ku-e-ziyan ke as-pas
un ko talash kijiye ham to milenge aap hi
apni bhi ja-e-bash hai gum-shudagan ke as-pas
sina-e-shab ko chiir kar dekho to kya saman hai ab
manzil-e-dil ke samne kucha-e-jan ke as-pas
vo bhi ajab savar tha aaya idhar udhar gaya
pahunchi na meri khaak bhi us ki inaan ke as-pas
alam-e-sard-o-garm ki kya ho bhala unhen khabar
vo jo rahe hain umr bhar shola-rukhan ke as-pas