Shamim Qasmi
naya lahja ghazal ka misra-e-sani men rakkha hai
hua ko muTThiyon men aag ko paani men rakkha hai
na jaane kya samajh kar chakh liya tha dana-e-gandum
abhi ik bhuul ne ab tak pashemani men rakkha hai
vatan se duur huun men rizq ki ḳhatir mire maula
magar basti ko teri hi nigahbani men rakkha hai
safar men bhi darama.i anasir kaam aa.e hain
zaban ki chashni se sab ko hairani men rakkha hai
ghazal kahne ka mausam ‘qasmi’ ab ho gaya ruḳhsat
sukun-e-qalb to us ki sana-ḳhvani men rakkha hai
mohazzab shahr ke lambe safar se luuT aaya huun
saliqa zindagi ka ghar ki virani men rakkha hai
Leave a Reply