jal ke raakh hone ki koshishen nahin hotin
der-pa bahut dil ki ḳhvahishen nahin hotin
ḳhud-ba-ḳhud hi khulte hain dil men phuul ḳhushiyon ke
dil ko shaad rakhne ki kavishen nahin hotin
dost bhi safon men hain aur apne dushman bhi
kamyab phir kaise sazishen nahin hotin
taḳht-o-taj mange se kab kisi ko milta hai
dil ki badshahi men baḳhshishen nahin hotin
ek justuju dil ko muztarib si rakhti hai
be-sabab to qismat ki gardishen nahin hotin
haal apna aa ke ḳhud vo hamin ko batla.en
ham se un ki ja ke to pursishen nahin hotin
mo.ajizon pe zinda hain aur dua.en karte hain
hijraton ke mausam men barishen nahin hotin
Leave a Reply