abrar-ahmad

Pas-Manzar Ki Aawaz

kisi bhule naam ka zaiqa

kisi zard din ki giraft men

kisi khoe khvab ka vasvasa

kisi gahri shab ki sarisht men

kahin dhuup chhanv ke darmiyan

kisi ajnabi se dayar ke

main javar men phirun kis tarah

ye hava chalegi to kab talak

ye zamin rahegi to kab talak

khule anganon pe

muhib raat jhuki rahegi to kab talak

ye jo ahaton ka hiras hai

use apne maile libas se

main jhatak ke phenk duun kis tarah

vo jo mavara-e-havas hai

use roz-o-shab ke hisab se

karun de dimagh men kis tarah

koi ansuon ki zaban nahin

koi ma-sava-e-guman nahin

ye jo dhundli ankhon men Dubta koi naam hai

ye kahin nahin

ye kahan nahin

ye qayam-e-khvab davam-e-khvab

rahun is se daur men kis tarah

unhi sahilon pe

tadapti ret men so rahun

mujhe izn-e-zillat-e-hast ho

More Poems

Leave a Comment