farishte imtihan-e-bandagi men ham se kam nikle
magar ik jurm ki padash men jannat se ham nikle
gham-e-duniya-o-din un ko na fikr-e-nek-o-bad un ko
mohabbat karne vaale be-niyaz-e-besh-o-kam nikle
gharaz ka.abe se thi jin ko na tha matlab kalisa se
had-e-dair-o-haram se bhi vo aage do-qadam nikle
sahar ki manzil-e-raushan pe ja pahunche vo divane
shab-e-tarik men jo nuur ka le kar alam nikle
mah-o-ḳhurshid ban kar asmanon par hue raushan
do aansu vo miri ankhon se jo sham-e-alam nikle
sukut-e-shab men ham ne ek rangin ḳhvab dekha tha
masarrat javedan hogi agar ta.abir-e-gham nikle
na milti hon sharab-e-zindagi ki talḳhiyan jin men
suna hai vo ‘ziya’ ke dil se aise sher kam nikle
Leave a Reply