vo ek shaḳhs ba-andaz-e-mahramana mila
mila vo jab bhi hamen zaat se juda na mila
hamen bhi apni jabin ko jhukana aata tha
magar talash thi jis ki vo naqsh-e-pa na mila
kisi ke husn ka mazmun ham raqam karte
so hasb-e-hal hamen aisa qafiya na mila
vazahaten to mohabbat men ham bhi karte magar
kitab-e-dil ka hamen koi hashiya na mila
use jafa ka jafa se javab kya dete
hamen mizaj mila bhi to dostana mila
na tha sarisht men ah-o-fughan ka rang koi
isi liye to hamen nala-e-rasa na mila
agar mile to use hal-e-dil hi kah dena
phir us ke ba.ad vo tum se mila mila na mila
misal-e-mauj-e-ravan sab guzarte jaate hain
isi liye to hamen koi naḳhuda na mila
Leave a Reply