Poet
dilon men mohabbat ki mahshar-tarazi
nazar se nazar ki magar be-niyazi
bahut Thokaren rah-e-ulfat men kha.in
magar shauq ki hai vahi hila-sazi
na rakhta zamane se koi ta.alluq
ḳhusha ḳhud-farebi zahe be-niyazi
rahe mutma.in ho ke pamal-e-ulfat
kuchh aisa tha afsun-e-banda-navazi
ye kis ko ḳhabar thi ki jan-e-tamanna
hai ma.asum nazron men fitna-tarazi
ubhar aa.e kuchh aur taare jabin par
mire ashk-e-gham ko mili sarfarazi
satati nahin fikr-e-manzil-rasi ab
ki raas aa ga.i hai safar ki darazi
ḳhataon pe hai harf-giri ki vaa.iz
nahin vaqif-e-shan-e-banda-navazi
Leave a Reply