Rashmi Saba
chand-taron ne koi shai to chhupa.i hui hai
varna kyuun raat pareshani men aa.i hui hai
us men tabdili miri ankhon ko manzur nahin
vo jo tasvir mire dil ne bana.i hui hai
marne deti hai na jiine ki ijazat hai mujhe
ek shai aisi meri jaan men sama.i hui hai
ham banate hain koi rahguzar roz na.i
roz divar zamane ne uTha.i hui hai
koi shikva hi nahin aur kisi se mujh ko
ye miri jaan to ‘saba’ ḳhud ki sata.i hui hai
Leave a Reply