Sufi
us se ummid-e-vafa ai dil-e-nashad na kar
zindagi apni is arman men barbad na kar
gila-e-zaur na kar shikva-e-bedar na kar
zulm sahne ka maza ye hai ki fariyad na kar
khalvat-e-dil hai tire aa ke thaharne ki jagah
teri marzi use barbad kar abad na kar
baghban taak men hai ghaat men sayyad hai dekh
sair-e-gulshan abhi ai bulbul-e-nashad na kar
kuchh tadapne ka sisakne ka maza lene de
itni tajil mire qatl men jallad na kar
ab mujhe taqat-e-parvaz nahin ai sayyad
rahne de qaid qafas se mujhe azad na kar
uupri dil se sahi kuchh to tasalli ho jaae
saaf inkar se zalim mujhe nashad na kar
dar-e-mahbub tak ai bakht mujhe pahuncha de
aur kuchh us se siva tu miri imdad na kar
be-dhadak jaan sabhi ahl-e-vafa dete hain
tu faqat mid.hat-e-ja.bazi-e-farhad na kar
gham-e-dildar ne rag rag ka lahu chuus liya
mujh se ab chhed tu ai nashtar-e-faulad na kar
laakh dushvar sahi zabt-e-fughan ai bulbul
magar ik uf bhi to be-marzi-e-sayyad na kar
sadma-e-hijr ke shikvon pe vo bole shab-e-vasl
gai guzri hui baton ko tu ab yaad na kar
ai dil us shokh ki tasvir tasavvur men to khinch
kaam maani se na rakh minnat-e-bahzad na kar
‘asi’-e-be-sar-o-saman ko pada rahne de
apne kuche se utha kar use nashad na kar
Leave a Reply