Qabil Ajmeri
hasti ko apni shola-ba-daman karenge ham
zindan men bhi ga.e to charaghan karenge ham
barham hon bijliyan ki hava.en ḳhilaf hon
kuchh bhi ho ehtamam-e-gulistan karenge ham
daman ki kya bisat gireban hai chiiz kya
nazr-e-bahar naqd-e-dil o jaan karenge ham
zulmat se be-karan to ujale bhi kam nahin
har dagh-e-dil ko aaj farozan karenge ham
ab dekhte hain kaun uḌata hai rang-o-bu
apna lahu sharik-e-baharan karenge ham
jin ko fareb-e-shauq men aana tha aa chuke
ab to tire karam ko pashiman karenge ham
Leave a Reply