takti jhankti rahi ankhen
jaane kya khojti rahi ankhen
honT ankhon pe rakh diye us ne
aur phir bolti rahi ankhen
ḳhvab ankhon men so ga.e lekin
raat bhar jagti rahi ankhen
ankhon ankhon men kya kaha us ne
der tak sochti rahi ankhen
us ki gahri si jhiil ankhon men
Dolti Dubti rahi ankhen
jaane kya dekhne ki hasrat hai
jaane kya dekhti rahi ankhen
jhuuT par jhuuT bolti hi rahi
sach magar bolti rahi ankhen
duur tak dekhte rahe us ko
der tak bhigti rahi ankhen
vo ulajhte rahe ‘tabassum’ se
aur dukh jhelti rahi ankhen
Leave a Reply