shah-naseer

Dil Ko Kis Surat Se Kije Chashm-E-Dilbar Se Juda

dil ko kis surat se kiije chashm-e-dilbar se juda

shisha-e-mai ko nahin rakhte hain saghar se juda

main to huun ai tala-e-bargashta dilbar se juda

aur patthar asiya ka ho na patthar se juda

us ke bahr-e-husn men mat chhod ai dil tar-e-zulf

gharq ho jaati hai kashti ho ke langar se juda

ishq men shirin ke tu ne jan-e-shirin di hai aah

naqsh tera kohkan ho kyuun ki patthar se juda

chashm ye tujh se hai ya-rab ta na ho lail-o-nahar

chashm us parda-nashin ke rakhna-e-dar se juda

kanda is mere nagin-e-dil pe tera naam hai

us ko apne khatam-e-dil ke na kar ghar se juda

is ko kahte hain mohabbat shisha-e-saat ko dekh

ek ke hota nahin hai dusra bar se juda

vo udhar khandan hai main giryan idhar hairat hai ye

barq chamke abr garje aur menh barse juda

surat-e-badam-e-tav-am roz-o-shab hota nahin

chashm-e-dilbar ka tasavvur chashm ke ghar se juda

sozan-e-be-rishta aati hai kasi ko kab nazar

to na ho ai ah-e-dil is jism-e-laghar se juda

parda-e-mina se saaqi dukht-e-raz nikle hai kyuun

aftab-e-khavari hota hai khavar se juda

us ki mizhgan se chhudaun dil ko kis surat se main

panja-e-shahin nahin hota kabutar se juda

taab us champa-kali ki yuun hai tikme ke tale

juun kiran chamke hai ho kar mahr-e-anvar se juda

ashk-e-chashm-e-tar ko rahne duun tah-e-mizhgan na kyuun

tifl ko karte nahin daman-e-mader se juda

is zamin men likh ghazal ik aur pur-maani ‘nasir’

rang yaani ho nahin sakta gul-e-tar se juda

is ghazal ko sun ke ‘khaqani’ kare vajd ai ‘nasir’

‘anvari’ bhi sar ko apne patke patthar se juda

More Poems

Leave a Comment