farar pa na saka koi rasta mujh se
hazar baar mira samna hua mujh se
daraḳht haath hilate the rahnuma.i ko
musafiron ne to kuchh bhi nahin kaha mujh se
ye be-hunar bhi nahin saath bhi nahin dete
na jaane hai mire hathon ko bair kya mujh se
main lauTne ke tasavvur se ḳhauf khata huun
lipaT na jaa.en kahin mere naqsh-e-pa mujh se
hazar baar janam bhi liya to kya ‘ash.har’
mira vajud bichhaḌta chala gaya mujh se
Leave a Reply