Ashfaq Husain
kisi gali kisi chhat par zarur niklega
vo chand abr se bahar zarur niklega
ye hukmarani-e-shab der tak nahin hogi
kahin se mehr-e-munavvar zarur niklega
isi girani-e-shab ki dabiz chadar se
numud-e-sub.h ka manzar zarur niklega
ḳhud apne aap se laḌni paḌegi jang hamen
dilon se ḳhauf ka lashkar zarur niklega
ye shahr-e-shishagaran hai to phir yahin pe kahin
kisi ki jeb se patthar zarur niklega
ghubar-e-dil-zadagan ko bahut haqir na jaan
ye ek hashr uTha kar zarur niklega
use ḳhayal-e-dil-e-dostan agar aaya
to ansuon ka samundar zarur niklega
kuredte raho viran bastiyon ki ye raakh
yahin kahin pe mira ghar zarur niklega
ḳhamoshiyon ki isi sar-zamin se ‘ashfaq’
koi na koi suḳhnavar zarur niklega
Leave a Reply