ye tiri ankhon ki be-zari ye lahje ki thakan
kitne andeshon ki hamil hain ye dil ki dhadkanen
pesh-tar is ke ki ham phir se mukhalif samt ko
be-khuda-hafiz kahe chal den jhuka kar gardanen
aao us dukh ko pukaren jis ki shiddat ne hamen
is qadar ik dusre ke gham se vabasta kiya
vo jo tanhai ka dukh tha talkh mahrumi ka dukh
jis ne ham ko dard ke rishte men paivasta kiya
vo jo is gham se ziyada jan-gusil qatil raha
vo jo ik sail-e-bala-angez tha apne liye
jis ke pal pal men the sadiyon ke samundar maujzan
chikhti yaden liye ujde hue sapne liye
main bhi nakam-e-vafa tha to bhi mahrum-e-murad
ham ye samjhe the ki dard-e-mushtarak raas aa gaya
teri khoi muskurahat qahqahon men dhal gai
mera gum-gashta sukun phir se mire paas aa gaya
tapti do-pahron men asuda hue baazu mire
teri zulfen is tarah bikhrin ghataen ho gaiin
tera barfila badan be-sakhta lau de utha
meri sansen shaam ki bhigi havaen ho gaiin
zindagi ki saaten raushan thiin shamon ki tarah
jis tarah se shaam guzre jugnuon ke shahr men
jis tarah mahtab ki vaadi men do saae ravan
jis tarah ghunghru chhanak utthen nashe ki lahr men
aao ye sochen bhi qatil hain to behtar hai yahi
phir se ham apne purane zahr ko amrit kahen
tu agar chahe to ham ik dusre ko chhod kar
apne apne be-vafaon ke liye rote rahen