kahta hai baghban lihaza na chahiye
varna chaman ka haal chhupana na chahiye
is mashvara ke saath ki charcha na chahiye
dil kah raha hai un pe bharosa na chahiye
paḌ jaa.e ḳhadd-o-ḳhal-e-manazir pe raushni
itne qarib se bhi nazara na chahiye
ham ghaur kar rahe hain to mahfil hai fikr men
uThna na chahiye ki uThana na chahiye
dastur hai guzarish-e-ahval-e-vaqa.i
qanun ye nahin hai ki shikva na chahiye
tufan-e-inqalab se mayusiyon ke ba.ad
kashti pukarti hai kinara na chahiye
gul-ha-e-rang-rang men Thanti nahin kabhi
ham ko bhi is lihaz se jhagḌa na chahiye
kaTti hai aarzu ke sahare pe zindagi
kaise kahun kisi ki tamanna na chahiye
mera qusur ye hai ki hubb-e-vatan men ‘shad’
likhta huun likh chuka huun jo likhna na chahiye
Leave a Reply