yaan kufr se gharaz hai na islam se gharaz
bas hai agar gharaz to tire naam se gharaz
aish-o-nashat-e-zist hai sab aap se husul
yaan shishe se gharaz hai na hai jaam se gharaz
tum paas ho agar to barabar hai raat din
kuchh subh se gharaz na hamen shaam se gharaz
dil pher dijiye na bigadiye huzur aap
yaan bose se gharaz hai na dushnam se gharaz
pad rahne bhar ko dijiye dar par hamen jagah
rahat se kuchh gharaz hai na aram se gharaz
ankhen dila milin hamen rone ke vaste
nakamiyon se kaam na hai kaam se gharaz
‘anjum’ ka sher kahne se bikna murad hai
tahsin se kuchh gharaz hai na ilzam se gharaz
Leave a Reply