Saif Zulfi
yadon ki guunj zehn se bahar nikaliye
gumbad na chiḳh uTThe koi dar nikaliye
khul ja.iye baraste hue abr ki tarah
jo chiiz dil men hai use bahar nikaliye
ban kar dikha.iye kisi bahzad ka javab
patthar tarash kar koi paikar nikaliye
rakhiye shanavari ka bharam kuchh na kuchh zarur
moti na haath aa.e to patthar nikaliye
manzur hai ghurur-e-ḳhizan ki agar shikast
gulshan se rang-o-nur ke lashkar nikaliye
qadir hai bahr-o-bar pe jo insan to aap bhi
ḳhat khinch kar zamin se samundar nikaliye
rakhiye ba-azm-e-ḳhas rah-e-zist men qadam
manzil baḌi kaThin hai magar Dar nikaliye
dushman bhi tiir joḌ ke baiTha hai ghaat men
ḳhandaq se dekh-bhal ke ab sar nikaliye
phir dost ko laga.iye dil se ba-sad-ḳhulus
phir apni astin se ḳhanjar nikaliye
phir chha rahi hai dajla-e-mahtab par ghaTa
is tirgi se phir koi manzar nikaliye
jo ho sake to vaqt ki zanjir toḌ kar
sham-o-sahar ka paanv se chakkar nikaliye
‘zulfi’ gali men aaj bahut tez hai hava
is kaghzi-badan ko na bahar nikaliye
Leave a Reply