Nasreen Naqqash
us ke ehsas ke jazbon ki kahani huun main
us ke ash.ar ki ghazlon ki javani huun main
meri sanson men mahakta hua sangit hai vo
us ki nas nas men tarannum ki ravani huun main
vo to saaya tha ḳhuda jaane kahan chhuT gaya
DhunDhti phirti huun us ko ki divani huun main
vo hai jaise kisi bimar ke honTon pe dua
pyasi ankhon pe barasta hua paani huun main
ghumte phirte the ‘nasrin’ jahan ham ik saath
jhiil ke paas ki vo shaam suhani huun main
Leave a Reply