Iliyas Babar Aawan
koi bhi ḳhush ho main apni ḳhushi samajhta huun
main zinda shaḳhs huun aur zindagi samajhta huun
ka.i to tum se bhi behtar mile hain log mujhe
magar kami hai jo us ko kami samajhta huun
ye vo dikhata hai jo raushni dikhati nahin
so main andhere ko bhi raushni samajhta huun
bahut si chizen hain jo meri had se bahar hain
so jitni had hai miri main vahi samajhta huun
chala to ja.ega lekin nishan chhoḌ ke yaar
agarche dukh ko bhi main sarsari samajhta huun
Leave a Reply