Ghulam Murtaza Rahi
hisar-e-jism mira toḌ-phoḌ Dalega
zarur koi mujhe qaid se chhuḌa lega
bana ke jis ne mujhe shahkar pesh kiya
hazar ḳhamiyan mujh men vahi nikalega
main apni jaan hatheli pe rakh ke chalta huun
koi bahut se bahut mujh se aur kya lega
ruke hue hain ka.i karvan lab-e-dariya
ki jaise aage koi rasta nikalega
ik ajnabi ke lahu par tha sab ka haq ‘rahi’
suna hai shahr ka har shaḳhs ḳhun-baha lega
Leave a Reply