Ek Jal-Thal Thi Kal Tak Ye Zamin Ye dasht Bhi Kal Tak dariya The

Sufi

ik jal-thal thi kal tak ye zamin ye dasht bhi kal tak dariya the

ye shor tha kal ik sannaTa ye shahar bhi kal tak sahra the

aghaz apna vahshat basri anjam apna shorida-sari

ham aaj bhi hain badnam bahut ham kal bhi nihayat rusva the

tanhai-e-zat ka saaya hai tanhai apna virsa hai

ham aaj bhi hain tanha tanha ham kal bhi tanha tanha the

maazi ke ḳharabon men bhi kahin lau deta raha suraj apna

maazi ke ḳharabon men bhi ham ik ḳhvab-e-jahan-farda the

apna hi to hai shahkar-e-amal tahzib ka ye zindan ‘akbar’

ham aaj hain shahron ke qaidi kal tak avara-e-sahra the