bhare zaḳhm phir taaza dam dekhte hain
ajab doston ke karam dekhte hain
koi lashkar-e-fatehin ja raha hai
fazaon men unche alam dekhte hain
ḳhayal-e-sanam bhi jamal-e-sanam hai
ab is taur ru-e-sanam dekhte hain
bani qatl gahen ye galiyan ye kuche
ajab maut ka raqs ham dekhte hain
kahin pal rahe hain amiron ke kutte
kahin muflisi ke sitam dekhte hain
utar kar falak se sitare bhi ‘shafi’
tiri zulf ka pech-o-ḳham dekhte hain
Leave a Reply