Poet
kuchh bhi kar paa.e na ham hijr ki hairani men
ghar bhi viran kiya dil ki pareshani men
rang hi rang hain bikhre hue daman men mire
rach gaya hai miri ankhon ka lahu paani men
jism apna bhi mahakta hua gulzar laga
phir tire gham ki hava aa.i hai jaulani men
yuun nigahon men utarne lage yadon ke nujum
dard bhi mahv hua a.ina-samani men
apne ḳhvabon ke tilismat se bahar to nikal
jism ko chhu ke kabhi dekh tu uryani men
suḳhan-e-garm ke pardon ko girane vaala
chhapne paaya na kabhi apni pashemani men
ḳhalvat-e-dil ke andheron men vo suraj nikla
mund ga.i aankh miri ruuh ki tabani men
afiyat DhunDne nikle the ḳhamoshi men ‘nadim’
ghir ga.e apni hi avaz ki tughyani men
Leave a Reply