Nooh Narvi
shikvon pe sitam aahon pe jafa sau baar hui sau baar hua
har baat mujhe har kaam mujhe dushvar hui dushvar hua
saaqi ki nashili a.ankhon se saari duniya saara aalam
badmast hui badmast hua sarshar hui sarshar hua
hai naam dil-e-muztar jis ka kahte hain jise sab jan-e-hazin
marne ke liye miTne ke liye tayyar hui tayyar hua
iz.har-e-mohabbat bhi hai ghazab iz.har-e-mohabbat kaun kare
hujjat un se jhagḌa mujh se har baar hui har baar hua
duniya men bahar ab aa pahunchi mai-ḳhane ka dar bhi khul jaa.e
ek ek gali ek ek makan gulzar hui gulzar hua
kyuun rahm vo zalim karne laga kyuun maut yahan tak aane lagi
ulfat se miri surat se miri bezar hui bezar hua
hasrat apni arman apna azar apna taklif apni
hamdard bani hamdard bana gham-ḳhvar hui gham-ḳhvar hua
milne se tanaffur tha jis ko aghosh men ab vo sota hai
taqdir miri iqbal mira bedar hui bedar hua
maqtal men jafa.en Dhane par maqtal men jafa.en sahne par
qatil ki nazar bismil ka jigar tayyar hui tayyar hua
ai ‘nuh’ ye kya sujhi tum ko tufan uThaya kyuun tum ne
saari duniya saara aalam bezar hui bezar hua
Leave a Reply