Raheel Farooq
tum apne husn pe ghazlen paḌha karo baiThe
ki likhne vaale to muddat se hosh kho baiThe
taras ga.i hain nigahen ziyada kya kahiye
sanam sanam rahe behtar ḳhuda na ho baiThe
ḳhuda ke fazl se ta.alim vo hui hai aam
ḳhirad to ḳhair junun se bhi haath dho baiThe
bura kiya ki talatum men na-ḳhuda.i ki
kinara bhi na mila naav bhi Dubo baiThe
mariz-e-ishq ka jaldi janaza niklega
kuchh aur der pata puchhte raho baiThe
tamam shahr men banTi hai dard ki ḳhairat
ham us ki diin ko dil men nahin samo baiThe
tumhari bazm bahut tang aur dasht vasi.a
chale to aa.e ghaḌi-do-ghaḌi hi go baiThe
bujhi na atish-e-dil hi kisi tarah ‘rahil’
vagarna yaar to ankhen bahut bhigo baiThe
Leave a Reply