Farooq Engineer
ab ehtiram hi kahiye use ki Dar ke ga.e
tire dayar men saare savar utar ke ga.e
hai barg-o-bar ka girna to qarz mausam ka
hava-e-tund parinde kahan shajar ke ga.e
ho shahr shahr ḳhamoshi ka kuchh sabab shayad
magar vo shor-o-shaghab bhi to bahr-o-bar ke ga.e
miri hi jaan ke dushman hain shahkar mire
mire ḳhilaf karishme mire hunar ke ga.e
har ik saval ka dete hain saaf saaf javab
vo kya ga.e ki bahane agar magar ke ga.e
kisi ke haath men patthar kahan vo sahn men peḌ
hamare ahd se mausam shajar hajar ke ga.e
hamen bhi kucha-e-qatil ka tha chalan ma.alum
isi liye to gali men tiri sanvar ke ga.e
to apne chak-e-gareban ka aa gaya hai ḳhayal
tamasha dekhne jab log idhar-udhar ke ga.e
na ishq hai vo na ghalib na astan na vafa
usi ke saath hi qisse bhi sang-o-sar ke ga.e
safar men der talak ham-safar tha ghar faruq
nazar men duur talak aks bam-o-dar ke ga.e
Leave a Reply