ajiib rang tire husn ka lagav men tha
gulab jaise kadi dhuup ke alaav men tha
hai jis ki yaad miri fard-e-jurm ki surkhi
usi ka aks mire ek ek ghaav men tha
yahan vahan se kinare mujhe bulate rahe
magar main vaqt ka dariya tha aur bahav men tha
urus-e-gul ko saba jaise gudguda ke chali
kuchh aisa pyaar ka aalam tire subhav men tha
main pur-sukun huun magar mera dil hi janta hai
jo intishar mohabbat ke rakh-rakhav men tha
ghazal ke ruup men tahzib ga rahi thi ‘nadim’
mira kamal mire fan ke is rachav men tha
Leave a Reply