Chanda Bhi Bas Raat Mein Achchha Lagta Hai

chandā bhī bas raat meñ achchhā lagtā hai

har banda auqāt meñ achchhā lagtā hai

chehra laal gulābī sā ho jaatā hai

vo mujh ko jazbāt meñ achchhā lagtā hai

mil kar chheḌte rahte haiñ sab yaar mujhe

zikr tirā har baat meñ achchhā lagtā hai

sajte haiñ us shoḳh badan par saare rañg

har kañgan us haath meñ achchhā lagtā hai

achchhā lagtā hai vo jaise gul-e-gulāb

phūloñ kī bohtāt meñ achchhā lagtā hai

yaad ga.e lamhoñ ko kar ke ro lenā

mujh ko har barsāt meñ achchhā lagtā hai

chhoḌ de ‘āsī’ pyaar ko chal mazdūrī kar

ishq achchhe hālāt meñ achchhā lagtā hai

Leave a Comment